Oleh : Hamdani*
Bier pe Lao masih soboh, tape uren enge muloi turun, akhire kami belongoh atan jamur tue besupu plastik. Selanjut te Amaku munilang rara. Atan rara si nge bangur, ama mugantung sara cerek tue, warna e nge item sangut akibat gati tu kona rara.
Sebelum me amangku mujerang waih bengi campur gule urum bubuk. Aku mungune ku amangku, sana kati nos kupi urum waih Bengi ! “Ama Hana kati Ama munaos kupi urum waih Bengi, si biasa e Ine nos kupi urum waih porak”
Pengunen ku kemudian ijeweb amangku. Ipak ini geral le kupi seger jerang. Selain rasa e lebih sedep bubuk urum gule pe lebih mokot Kona jerang, jadi tangkuh jering urum bau sedep pe anak ku, perin amangku. Kemudian amangku munaduk munurut ukuren ne. Selanjut te amangku munikot tali owe ku tiang ni jamur plastik. I ujung ni owe a, ikot ne kekawit, gune e kin pengawit ni cerek kati nguk i gantung i mata ni rara.
Kurang lebih 10 menit kupi si jerang Ama nge musiyu, Ari wan cerek tue nge tangkuh bau sedep ni kupi Gayo. Kemudien Ama nunatangen cerek renye munuang kupi kowan mangkok. Renyel Ama munuang kupi ko wan gelas putih. Nah ini enumen niko tikik kati pesam beden wan musim uren ni, perin amangku. Meh oya amang ku becerak mien. Ipak ini le geral le kupi seger jerang. Kene amangku.
Akhire aku, inengku rum amangku murum murum minum kupi si begeral kupi seger jerang. Selanjut te kerna nge mari mujerang kupi. Inengku renyemi munenyel ni belanga male mujerang jantar pucuk ni Jepang. Wan kekelang ni oya Ama pe renye munueten legen kayu, dabuh mumipis lede caplak, terasi campur lasun ilang tamah asam jering. Seseger Ama munyintung rara dan seketike Oya Ama mubalik balik balik gule masin tunu.
Singket ni cerite jantar si jerang Ine pe nge tasak, gule masin si tunu Ama pe nge tasak, cecah lede pe nge siep, taring mangan mi wa. Sebelum me kero nge i jerang Ine iumah. Kupenge le soboh ne Ama becerak. “Seni musim uren, iumah ni deh jerang kero. Kase Ike gaeh pe uren i empus, kero te nge ara beta kene Ama ku Ine.
Sekiter pukul 12: 30 Baro kami mangan ruhul atan jamur tue i empus rebe, terasa sedep pedih mangan wan empus rebe bier pe pongkero e gule masin tunu, tamah cecah lede urum terasi tunu. Nge mari ruhul uren pe nge sidang, kemudian Ama urum Ine beluh semiang. Ulak semiang Ama urum ini lanjut mien mungutip kupi. Sekira pukul empat Iyo kami pe bergerak ulak Ari empus, Ama mujujung kupi den begitu sawah ku jamur, tibe tibe geh renye toke kupi mubeli kupi. Ara tulu tem kupi e ilang. Ku engon le Ama munerine sen ilang male sekire lime ratus ribu.
Lagu ini le kebiasaan ni kami ike nge lo mingu meh ne berangkat ku empus. Kadang kami ngutip, kadang belelesen kadang mulelang,, Kedang Ama munyeding, munyerlak. Pokok e gure pedih beluh ku empus, apalagi seni rege ni kupi tengah mal. Kire kire Ike belelesen pe kite demu senare kupi, genap kin jajan sekulah opat Lao, kemakin demu tai musang inowow gure e enge mutetumpuk.
